KUMPULAN PUISI ISWAN SUAL

Antologi Puisi

Bahasa  Manado

Lingkaran Setang

“Ca La’us Lemala Sa Tenang Marisa.”

“Tak Langsung Pedas Bila Terkena Cabe.”

“Akibat dari perbuatan jahat tak langsung dapat dirasakan.”

-Stien Timporok-

Lingkaran Setang

Sanksi pelanggaran pasal 44:

1.      Barangsiapa dengan sengaja dan tanpa hak mengumumkan atau memperbanyak suatu ciptaan atau memberi izin untuk itu, dipidana dengan pidana penjara paling 7 (tujuh) tahun dan/atau denda paling banyak Rp 100.000.000,- (seratus juta rupiah)

2.      Barangsiapa dengan sengaja menyerahkan, memamerkan, mengedarkan, atau menjual kepada umum ciptaan atau barang hasil pelanggaran Hak Cipta sebagaimana dimaksud dalam ayat (1), dipidana dengan pidana penjara paling lama 5 (lima) tahun dan/atau denda paling banyak Rp 50.000.000,- (lima puluh juta rupiah).

Judul:

Lingkaran Setang

[KUMPULAN PUISI]

Hak Cipta © oleh Iswan Sual

Penerbit The Humanizer College

Jln. Tondei-Ongkau Tondei Satu

Editor: Iswan Sual, S.S

Desain Sampul: Iswan Sual, S.S

Setting: Iswan Sual, S.S

Diterbitkan pertama kali

 oleh The Humanizer College, Tondei Satu 2012

Hak Cipta dilindungi undang-undang.

 Dilarang mengutip atau memperbanyak

 sebagian atau seluruh isi buku ini

tanpa izin dari Penerbit.

Dicetak oleh Percetakan The Humanizer College, Tondei Satu

Isi adalah tanggung jawab percetakan

PANGANTAR

Cinta bahasa daera sandiri nyanda sala. Karna torang bole mo cinta torang pe negara ini mulai dari torang pe daera dulu. Buku kumpulan puisi deng judul Lingkaran Setang: wujud dari kita pe sayang deng cinta pa budaya Minahasa, pa Indonesia. Karna dari bahasa torang bole kenal bangsa. Dari bahasa torang bole tau sapa dorang. Ini buku: bukti kalu orang minahasa pantas ja bilang akang: orang kuat, orang bae deng orang baontak (Tou ente, Tou sama, deng Tou  nga’asan).

Lingkaran Setang: gambaran dari penulis pe tanggapan deng harapan. Penulis baharap spaya mo banya orang-orang Minahasa mo tatarek batulis, babaca deng mo bakarya. Deng bagitu torang bole mo pertahankan torang pe bahasa Manado. Karna ni bahasa lama-lama mo ilang kalu torang nda brusaha mo beking depe dokumentasi. Ni buku: dokumentasi tu mo beking tu bahasa Manado mo tasimpang. Ni buku mo beking spaya anak cucu nanti mo dapa tau apa torang da beking skarang. Deng bagitu lei dorang tau kalu torang da pake bae-bae tu ontak.

Memang, ni karya pe kacinong skali stow. Mar ini kita pe karya. Mana ngoni punya? Kita batanya bukang basosere. Mar kita mo tantang torang samua spaya beking torang pe karya sandiri. Jangang salalu cuma rasa orang laeng pe karya. So depe waktu torang mo terapkan tu slogan think globally but act locally-think locally act globally. Bapikir global mar bertindak lokal-bapikir lokal bertindak global.

Kita yakin torang bole mo se wujud tu harap-harapan itu. Yang penting torang mulai. Torang nda akan perna tau torang sanggup kalu torang nda perna mulai!

Di lembar ini le kita mo bilang makase for Papa deng Mama (Lexy Sual deng Selvie Tombuku) yang jadi sumber inspirasi.  Kalu bukang ngoni, kita nda jadi orang. Makase lei for Iswadi Sual (kita pe ade). Makase for tamang-tamang: Rikson Karundeng, Deni Pinontoan, Fredi Wowor. Ngoni samua orang-orang muda yang butul-butul berjuang for Minahasa for hari di muka. Ngoni so jadi trigger sampe kita ta iko bakarya.

Makase for guru-guru SMP Kristen Tondei: Bapak H.B. Sondakh, Ibu Maria Th. Djamen, Ibu Polin Sual, Ibu Selvi Bujung, Ibu Dei Wowor dan Ibu Helly Paat yang so pertama-tama  kase penghargaan.  Ngoni pe kata-kata  beking kita  lebe brani mo bakarya.

Panulis,

Persembahan deng Pengakuan

K

ita kase ini karya for kita pe orangtua, yang se hidop pa kita deng kasi sayang yang bagitu tulus, kita pe ade, Iswadi deng maimuda, Della, yang snantiasa berbage cirita deng cinta, kita pe barekeng anak lai yang masi kacinong-kacinong mar jadi sumber inspirasi deng harapan desa Tondei di masa depan: Queenta, Gloria, Aprilino, Sreichen, Gerry, Delon, Cindy, Egen, deng kita pe murid-murid di SMP Kristen Tondei dan SDN INPRES Tondei, yang kebanyakan susa ja ator mar yang beking kita sadar for trus babekal diri deng blajar spaya bole ba ajar deng bagus.

ISWAN SUAL, S.S

Buku ini kita kase for

Della Palapa (kita pe maimuda)

Iswadi Sual & Irma Sual (kita pe ade)

Gloria Sual, Queenta Muntu untu, Aprilino Sual (kita pe barekeng anak)

Lexy Sual & Selvie Tombuku (kita pe amang deng inang)

Melayu Manado (1)

Biar ta amborambor torang

Ngana datang se malakat

Ta saleng di satu blanga satu bicara

Torang tatawa samasama

          Deri Tahuna sampe Gorontalo

          Tadengar tabilang logat Manado

          Cuma, orang muda jang manganto

          Bakarya jo biar fugado

          For hari eso, awas jang manggoro

Pe panjang kuala Ranoiapo

Torang jaga Bahasa Manado

Pe pasung pante Makalisung

Deng bagitu tu harta tatunjung

Orang laeng nda pandang enteng

Samua so mulai pa om Yan Tatengkeng

          Bahasa Manado itu kita pe nafas

          Depe tampa dorang so rampas

          Kalu torang nda bakras

          Sama deng for dia torang sadia krans

Yang mangaku sastrawan mari kase jelas

Mo trus ato so mo menyera

Yang da skola mari jo bagra

Mo suka nae ato tatinggal klas

Ndak Berdaya Ato Apatis

Qta pegawai,

Da lati patuh pa atasan

Sala ato benar.

Itu kata depe nama setia

Tau jaga nama kantor.

Qta siswa,

Da ajar hormat guru

Sala ato benar

Itu kata depe nama murid ndak nakal

Tau jaga nama skola.

Qta anak,

Da didik spaya jang manyau pa orang tua

Sala ato benar.

Itu kata depe nama anak tau hadat. Ndak durhaka.

Tau jaga nama keluarga.

Apa so tu kabenaran?

Sapa punya so tu kabenaran?

Boleh so tu kabenaran pake syarat?

Qta mo beking tu benar

Dorang bilang qt penghianat,

jual tu skola, beking malu orang tua.

Qta iko akang dorang pe mau.

 qt tako pa Tuhan, pa moralitas!

Oh Tuhan

Qta mo bagimana?

So musti bagini re’e tu hidop skarang?

Cuma atasan, guru, orangtua yang punya tu benar.

Torang orang kecil

 ndak boleh tau deng beking tu benar.

Mo maso re’e naraka torang samua!

Melayu Manado, Kita Pe Bahasa

Mulu ini biar bagabu

Cumu ini cumu itu jarang tutu

Yang penting ni lida manari

Deng bahasa sandiri

Nda basombong mangaku Manado

Mar cuma prong nda ada isi

          Lida talipalipa mar bangga

          Nda pake katakata panjaja

          Deripada pelak bak aksi se tunjung fasi

          Mar nda sadar so lupa warisan sandiri

Bahasa Wenang bahasa kemajuan

Torang musti sanang

Pa laeng torang nda bagantong

Tagalitu jaga kong simpang

          Bahasa Wenang musti tatulis

          Baku abis kalu baku abis

          Opa oma so rintis

          Depe anak cucu mo se trus

Bahasa Wenang tatanang di dada

Ta maso di kapala

Biar dorang mo tatawa

Nda perna ada kata menyera kita mo bawa

Gelisa Yang Nda Ada Ahir

Saban hari hati manangis

Lia pa orang-orang yang cuma suka mengemis-mengemis

So ilang tu harga diri

Padahal masi kuat mo mancari sandiri.

Saban hari kita murung-murung

Lia pa dorang yang cuma suka cirita orang pe kurang

Sampe so lupa ada anak SMA

Sadiki lai smo kulia

Tiap hari beban tatamba

Bukang ta kurang

Tiap hari utang tatamba

Bukang ta turung

Laki pulang kerja lebe suka bamabo

Deripada brusaha mo didik tu kacili

Istri sibuk ba uni

Deripada mo urus laki

Generasi buta-buta

Papa bilang:

Anak,

 ngana sudah jo skola

Baku tulung jo deng papa iko bagula

Itu lebe bae. Jang nanti serta so ta bae

Ngana cuma tipu-tipu orang tua

Anak,

ngana jang coba skola tinggi

Cukup jo so tau babaca deng batulis

Qta nda suka mo jual tana

Jang kage ngana gagal

Dapur so nda mo ba asap

Ta tutu qt pe blanga

Mental Hedonis

So dapa dengar formasi CPNS 2010 so buka

Pe banya orang bacakar cari-cari ijasa

Cari ulang di Iemari ato di peti

Kong pigi perbanya di tampa fotokopi

Nyanda pernah jadi honor

Kage-kage minta beking eS Ka  skaligus nomor

Tukang beking jadi tampa bastor

Doi doi hasil kerja- kerja kotor

Banya cari kesempatan

Satu lembar legalisir maso popoji sampe fol-fol

Ado kasiang torang pe pegawai pe mental

Su jadi tukang tipu

 baskongkol deng pejabat-pejabat

peras tu orang baru mo cari kerja

Dorang le cuma ta io-io

Yang penting bole lengkap berkas

Bole iko ujian Ce Pe eN eS

Samua bakuriki ba urus

So top tu istila lebe iko rame deripada iko mata

Inga-inga kalu jadi Pe eN eS,

Gaji bole kase gade di bang

Bole bli ruma, blackberry, notebook

Nda kala dari birman

Biar jo anak nda dapa anggaran

Ada kwa pemerinta

Gratis.

Nda usah kulia

Ijasa eS eM U ato eS eM K so bole iko Pe eN eS

Mandi Tai

Baharap skali

Jadi orang suci

Tahang ni diri

          Saban hari

          Baca kitab suci

          Pikir ni hidop pe arti   

          Sampe lupa mancari

Karna Ha Be O trus tu ja uni

Napa kita so ciri

Hari-hari manyasal sandiri

Barasa badan so mandi deng tai

So Ini Tu Natal?

Petas-petas ba bunyi kras

Bunga api deng roket ta ambor-ambor di langit

Senter klas bajalang beking tako anak-anak

So ini tu natal?

Hari kamis orang bakurebe ka pasar

Baku susung baku gepe sampe tasuar-suar

Laeng ka Amurang deng ka Manado sampe tapuas-puas

Baju, calana, capatu, hape baru musti bli

So ini tu natal?

Ibada pohong trang tiap hari

Ibada natal dua kali

Ibada taun baru dua kali

Musti banya kali.

Spaya baju, calana, capatu deng samua-samua tatunjung orang mo lia

So ini tu natal?

Biar ngoni bilang nyanda. Mar itu depe kenyataan.

Kalu bagitu, se ilang jo tu natal

Bangong Pagi Buka Jandela

Bangong pagi buka jandela

Mangada Sinonsayang

Blum dapa lia trang

Masi dingin badan totofore

Se hidop motor

Kita  ma ka Tondano

 Turung jalang Ongkau

Sama deng iko kuala kering

Tatada rasa-rasa mo ciri tu jantong

Tuangala le!

So jaman bagini

Mar blum merdeka

Pejabat lebe banya bajanji

Serta jadi kerja stenga hati
Tunggu ngoni!

Brikut, biar ngoni ciong ta pe panta

For ngoni kita rabe mata.

Budo

Ujang rinte-rinte

Ciri plang-plang ni pagi e…

Padahal musim cingke

Beking buru susa mo bapete

Nyong deng nona jadi somu-somu

Ni panen nda jadi bli hape deng motor baru

Pendeta bilang: “mungkin torang kurang bakorban

Musim pemetikan mar manyasal mo kase persepuluan”

Bos rugi buru le rugi

Cingke budo-budo

Harga turung bukang main dapa tako

Konsumerisme Warisan Blanda

Libur abis

Doi abis

Cita-cita anak mo skola

So nda ada

Satu keluarga bahaga iko mata

Panen besar trima doi besar

Maso warong kong main pesan

Minung-minung  sampe tenga malang

Panen klar abis babi putar

Brapa tu bon di daftar

Nanti korang mo dengar

Kita Musti Mati Di Sini

 Punung deng cingke

Punung deng klapa

Punung deng bua-bua

Kaya kita pe tana, kaya kita pe ruma

          Banya pisang

          Banya ubi

          Banya pongseo

          Banya sayor

          Nda mungkin torang mati deng lapar

Aer nda kurang

Kayu masi cukup

Udara masi sedap ja isap

Dekat pante

Dekat Winosirang

Dekat batu Lutau

Dekat Tetewatu

          Kala taman Eden.

          Kita musti mati di sini 

Dorang Lupa

Samua basibuk beking kukis

Tatinggal di dapur

Hari minggu nda maso greja

For tamu nda tau dari mana samua

Dorang lupa hari itu pe makna

          Pasiar baron-ron kampung

          Sampe abis minya tu motor

          Se tunjung gaya se tunjung panta

          Tenga-tenga malam baru pulang

          Dorang lupa hari itu pe arti

Makang minung sampe munta

Ta isi di got

Cari hal deng tamang

Cari hal deng birman

Bakalae pulang sabel depe laste takurung di sel

Dorang lupa hari itu pe guna

          Tu bagus jadi besae

          Tu besae tamba besae

          Tagalitu, apa tu so stel

          Jang coba-coba betel

Nda Laeng kita

Waktu ta pe badan so dekat tapisa deng jiwa

Nyanda laeng kita mo minta

Tanang kita pa kita pe tana

Tanang kita pa kita pe ruma

          Biar kita busu,

          Tana tamba gumu

          Biar kita busu,

          Tana tamba subur

Waktu kita pe nyawa sadiki le tacabu

Nyanda laeng kita mo cumu

Tondei pe gaga skali dari dulu

Tondei pe sadap skali di mulu

          Biar nafas abis,

          Kita nyanda mo manangis

          Biar kuat abis,

          Kita nda pesimis

Waktu kita be badan so amper nda bagra

Nyanda laeng kita mo inga

Tondei salalu tabawa

Biar kita so nda ada mar tetap tatawa

          Tondei jadi kita pe tampa

          Dari lahir sampe so nda ada!

Puf! Paf! Ancor!

Oh karu e

Torang pe generasi

So nda suka mo makang ubi

Lebe suka roti ato supermi.

Oh kasiang e

Torang pe bini deng laki

Lantaran gengsi deng mo ba aksi

Jual diri ka pulau cendrawasi.

Oh re’e karu e

Kyapa dorang so nda ta ator?

Bajalang melep-melep bataria kotor

Bapaksa lei musti bli akang motor

Padahal masi ja kincing di tampa tidor.

Kong, torang-torang cuma mo se biar?

Bapikir! Tegor!

Jang saban hari torang ajar!

Puf! Paf! Ancor!

Didik tu anak-anak deng lo’or

Spaya opo kasuruang sanang

Urus pa dorang

Jang cuma tidor

Sitou timou tumou tou

Bukang sitou timou tumongko tou

Tanda Awas For Tou Minahasa

Tou Minahasa:

Tou ente

Tou lo’or

Tou nga’asan

Jang bapica

Spaya nda gampang dapa jaja.

Jang ngale

Spaya nda gampang kere.

Jang rupa ular

Spaya nda gampang ancor.

Jang basetang

Spaya nda katula akang

I Yayat U Santi!

Dulu torang bangga deng sanang

Kalu tinggal di kampung.

Hidop dari hasil kobong deng utang

Sinonsayang deng Lolombulan.

Mar skarang so nda da ampung.

Kayu-kayu dorang se abis-potong

Napa so siksa cari aer minung

Deng mo makang.

Cek per cek tu kuntung

So bota-bota ada orang

Sandiri cari untung.

Dulu cari rampa-rampa

Cuma di muka ruma.

Samua ada

Nda siksa mo momasa.

Mar skarang, oh tuang…!

Karna mo rabu-rabu

Bli pa mas-mas bajalang.

Kaluar doi

Padahal boleh batanang.

Qta rasa kasiang

Pa orang-orang skarang.

Suka iko-iko orang kota pe bahodeng

Suka bodi-bodi artis krempeng

So tamakang promosi pe buju-buju

Tu kapitalisme tinggi dorang junjung

So musti bangong

Jang bingo so deng taun

Gombalisasi torang lawang

User tu orang-orang sialan

Dari tana Tou Minahasa

So cukup dorang injang-injang pa torang

So depe waktu angka sabel bataria prang!

I Yayat U Santi!

Jaman ST12

Tondei tana tampa kita lahir

Kita pe pusa

Nenek da se gale di sini

Waktu itu belum ada pemekaran

Kalu pi Motoling ato cuma Raanan

Jalang babatu timbul, lewat utang,

Ba pece-pece kalu ujang,

Terpaksa biar hartop

Ika tali labrang kong ela deng tola

Lebe cilaka, lengkali ada yaki badola

Tondei tana tampa kita besar

Skarang so tiga. Keluarga so ta pica-pica

Laeng di gunung, di Li’ba,

di Ameko deng di Amonge.

Tu basudara so tabage-bage

Skarang,

Mangalitou deng mangala’ung

Biar satu fam

So bole baku kaweng.

Mar orang tua bilang

Anak-anak skarang

So ndak tau sopan.

Di tenga jalang

Baku pegang tangang

Baku-baku ciong

Di tampa trang

Sama deng di felem-felem

Orang-orang muda bilang:

Tu tua-tua kwa so ketinggalan jaman

Skarang duaribuan

Bukang enampuluan ato tujupuluan

Skarang jaman internetan

Bukang lagi kalelon deng kolintang.

Dulu suka Panbers

Skarang ST 12

Dulu top tu Koes Plus

Skarang Dewa 19

Torang so tau hukum!

Orang muda ndak dungu

Apa guna re’e da skolah

Nasehat torang tenteng

Mar jang karma beda jao tu umur

Kong pandang enteng

Tiap-tiap generasi

Mati-matian bilang depe jaman lebe bagus

Itu depe nama narsis

Generasi egois. Generasi sentris

Dua-dua butul

Asal kalu jadi apa-apa

Jang tanya sapa tu sala

Beking jo tu maso-maso akal

Spaya nda mo menyesal

Orang tua so kase bekal

Tanta -Tanta Karlota

Birman deng birman

Baku bataria.

Tanta amonge:

Lawut! Nga baku cuki

deng qta pe laki. So kriput masi mo ba aksi.

Tanta ameko:

He lonte! Apa nga bilang e?

Dua-dua panas baku rado

Baku ela rambu

Baku guling-guling di kintal

Sampe ta isi di got

Got punung deng tai-aer kincing.

Deng sisa-sisa aer cuci piring.

Orang takumpul

Tatawa akang.

Dapa urus

Kumtua bilang: tagalitu ku’a,

Ngoni jang babakumpul,

Kong cirita-cirita orang

Awo…lia kasana! Korang beking malu.

Laki stenga mati bagula. Ngoni lupa momasa

So ba rei cari kutu baseri orang pe kurang.

Laki siksa bakopra. Ngoni sibuk bakarlota.

So baku goso rica. Baku dusu deng gunting.

Pulang di ruma. Urus ngoni pe anak deng laki

Kong brenti tu mulu-mulu Yudas!

Rajin pigi ka greja

Ontak sama deng tuturuga!

Lebe bae tinggal di ruma

Ba uni telenovela.

Tumani

Opo Muntu-untu

Datang tumani

Opo Wongkar

Datang tumani

Opo Timporok

Datang tumani

Opo Sual

Datang tumani

Opo Mogogibung

Datang tumani

Samua voor torang

Samua pe sanang

Bakalae deng Mongondo

Spaya anak-anak hidop.

Bakudusu deng mamuis

Spaya anak-anak ndak manangis.

Opo Timporok

Tangka satu Mongondo

Potong akang talinga

Kong bilang:

Pulang! Jang bale-bale!

Ini bukang lagi ngoni pe tana!

Ngoni pe raja so se harta

Kong bawa pigi torang pe nona.

Opo Timporok

Bakudapa lagi satu Mongondo

Dorang bakalae, baku potong

Amper satu hari

Nda satupun tu kala

Padahal so tahosa-hosa .

Dorang brenti

Opo Timporok bilang:

“E kaloh…napa hau baroko dulu”.

Satu dua kali isap eef…fuu….

Dapa tau mongondo pe tampa mati

Di tlapak kaki

Bakalae ulang sampe di ujung kalapa

Opo Timporok di bawa

So nda mangada ka atas

Sek…sek…Dia cucu

Puk….ciri tu mongondo.

Mongondo kala

“Ampung pa kita”

So terlambat.

Opo potong tu kapala

Tanang di dalam tana

Disitu badiri greja

Pertama-tama menurut sejara

Baru Klamaring

Baru klamaring,

Kita lia ngana tatawa.

Ngana awet muda

padahal so ba poyo’

Nda perna kita lia ngana bamara

Biar kita susa mar jadi nda dapa rasa

Aneh,

Ngana bukang kita pe mama

Bukang kita pe nene

Nda ada hubungan dara

Cuma birman

Skarang ngana so nda ada

Pigi nda bilang-bilang

Mar ta tau ngana ada DISANA

Mungkin smentara lia-lia kamari pa torang dari sorga

Musim Duriang

Biar dingin pagi batotofore

terpaksa bangong

Ambe senter sadia karong

Bawa sabel spaya nda da yang brani kore

          Cepat…cepat…spaya dapa banya

          Kalu plang nanti korang bahaga

Jaman skarang, makapunya bakurebe deng papancuri

Kalu nda, jare torang gigi

Demi doi papancuri jual bua baduri

Terpaksa, ini demi hidop anak deng istri

          Makapunya dalang hati mamutung

          Pikir-pikir mo dapa untung

          Pe sampe di bawa pohong

          Di tana nda ada satupun

Dia bilang:

Lebe bae ni pohong kita potong

Karna duriang kita saki hati saban taon

Deng bagitu kita pagipagi skali nda perlu bangong

Anak Skola Apatis    

Datang pagi pulang tengari

Datang kosong bale ontak nda da isi

For apa bapaksa?

For apa baskola?

Kalu ijasah bole bli

Beking apa blajar stenga mati

Jaman skarang so caparuni

Samua ta iko mau kalu ada doi

Ma’gula

Amper siang angko so bangong

Tu laeng masi manggoro

Malakat di bantal polo

Pagi buta bajalang ngana ka kobong

          Samua for torang

          Spaya kopi deng the rasa manis

          Spaya kola deng kokole rasa sedap

          Samua snang makang sampe kenyang

Masi gelap nae seho

Seturung sareng sampe uraturat

Tengari pikul kayu

Isi di porno saguer mandidi

Datang gelap pulang gelap

Ini hari

Amper lari depe jiwa

Dengar harga turung tagilagila

Dia sapusapu dada

Beso makang so nda ada

Ma’kopra

Naenae sampe langit

Mata tawilok deng senget

Dada tacukur

Lantaran nda tahan

Deripada ciri lebe bae balucur

          Kumpul di tampa kopra

          Kupas kuli bla biji

          Serta masa kore kore capat sadia

          Manjae karong muat di roda

Makopra dengar harga turun dia sapu dada

Potongan persen tinggi beking tatamba lala

Nda ongkos amper munta dara

Tu tenaga abis percuma

Melayu Manado (2)

Ngana lem beking torang ta tempel

Sangir Minahasa jadi basudara

Mongondo Gorontalo ta bakudapa

Torang satu di pasar torang satu di terminal

          Dari lahir sampe mati

          Ngana malakat di lida

          Ta maso jao ka dalang kapala

          Kita cumu sampe ta pe nafas ta brenti

Ngana gula beking tatawa

Isapisap tetap rasa sadap

Tabawa sampe Jakarta

Tainga biar so di Amerika

          Ngana beking kita bangga

          Dari bahasa kenal bangsa

          Biar Inggris dapa dengar gaga

          Nda lawang torang pe katakata

Ngana dara mengalir deras di ta pe nadi

So jadi tulang deng daging

Ngana urat deng sendi

Jadi lambang smangat blum kering

Pantun Grapgrap

Tempo, serta dengar ujang datang

Torang kacilikacili balari

Buka pintu buka jandela

Manari manyanyi tatawa geli:

“Ujang kras nene bli beras

Tete buka kas dapa lolo petas-petas.

 Ujang kras nene bli beras

Tete buka kas dapa lolo tai kras.”

Lingkaran Setang

Kita pe tana

Brarti kita tu mo ola

Bukang orang Jawa ato Sumatra mo rampas.

Kita pe kaya

Sharusnya kita ndak sengsara

Mar kyapa kita iko mata?

Kita pe bangsa: Minahasa

Dijaja bangsa Amerika

Deng tangang-tangang penguasa.

Kita malu pa Om Sam

Torang deng torang baku makang

Ta maso di lingkaran setang

Atas nama persatuan

Hidop Apa Tu Bagitu?

Baku cucu, baku tikang

Baku bunu lantaran warisan

Kristen tare, baku jual

Cuma lantaran budel

Lebe bae re’e hidop di jaman wentel

Terbang-terbang

Baku potong

Deng hoga-hoga

Deng mamu’is

User Mongondo

For hari eso.

Daripada di muka-muka

Baku senyum

Tipu sini tipu sana

Jadi linta darat.

So jadi tradisi

Orang babilang:

Torang keluarga

Mar doi ndak basudara.

Orang-orang hidop

Di atas orang laeng pe susa

Kalu banyak harta

Mangaku sudara

Tolak-tolak kalu susa.

Wo Tobat!

Panas hati kita

Mama bilang mo goso rica

Brani manyau pa orangtua

Mentang-mentang da skola

Rasa-rasa kita

Mo kaluar dari ruma!

Banting pintu

Ribut-ribut

Langsung cabut

Lari deng motor but-but

Ahirnya,

Dapa katula.

Tondei Satu, ahir April 2010

[Datulis samasama deng muritmurit

 klas 3 SMP Kristen Tondei]

“Walung Susuyeng Eng Wangko

 Eng Walung Kasia’ang”.

[Vorat Ilmu Lebe Besar Deri Itu Vorat  Kapunyaan]

-Johny Palapa-

“Makang Nasi Tus-Tus

Makang Ikang Kodo

Putus Ya Putus

Mati Ya Mati

Inila Semboyan Anak Manado”.

-H.B. Sondakh-

l, S.S adalah seorang pemula dalam persoalan sastra. Namun sangat prihatin dan begitu bersemangat dengan hal ini. Dia adalah lulusan S1 dari Universitas Negeri Manado. Fakultas Bahasa dan Seni. Jurusan Pendidikan Bahasa Inggris. Program Studi Bahasa dan Sastra Inggris.

Dia berprofesi sebagai seorang guru di sebuah SD dan SMP di desa Tondei.

Banyak terlibat dalam kegiatan gereja dan kemasyarakatan di desanya. Sekarang ini menjabat sebagai Ketua Komisi Pelayanan Kategorial Pemuda Jemaat GMIM “Bukit Moria” Tondei Satu.

Suka membaca dan berekspresi lewat. Tertarik untuk belajar politik, sejarah, sastra dan seni budaya dan ingin sekali melahirkan karya-karya yang berdasar pada pemikiran Tou Minahasa (Minahasan-based Thought).